Jákup Sverri kom aftur 20. juli eftir túrin, sum byrjaði 2. juli. Miðalveiðan var 164 kilo av makreli á hvørjari trolstøð. Túrurin var partur av felagskanning millum Føroyar, Ísland, Danmark og Noreg.

Makrelurin var lakari eystarlaga

Konditiónsfaktorurin hjá makrelinum var lægstur eystarlaga í kanningarøkinum og hægri í útnyrðingspartinum. Konditiónsfaktorurin vísir, hvussu væl fiskurin er í holdum, og kann samanberast við BMI hjá fólki. Miðaltalið í juli var 0,9.

Mest av seks og sjey ára gomlum makreli

Mest varð fingið av seks og sjey ára gomlum makreli. Stórur og gamal makrelur var fyri tað mesta í útnyrðingspartinum.

Jákup Sverri fann eisini nakað av sild kring Føroyar, serliga eystan fyri Hetland. Svartkjaftur var í nærum øllum kanningarøkinum, burtursæð frá føroyska og evropeiska landgrunninum.