Leygardagin 7. november klokkan 11 verður almenn móttøka og skipsdópur í Søldafirði, tá nýggja farmaskipið Hav Fles kemur til Føroya.

Hav Fles er annar nýbygningurin hjá Navigare Shipping, sum er í ferð við at endurnýggja flotan.

Fyrr í ár tók reiðaríið ímóti Hav Leiti, sum var fyrsti nýbygningurin í 60 ára longu søgu felagsins. Hav Fles er systurskip hjá Hav Leiti, og tvey nýggj skip afturat verða latin reiðarínum næsta ár.

Minni oljunýtsla og lægri útlát

Sambært Navigare Shipping kunnu nýggju skipini flyta størri farmanøgdir og brúka minni olju. Hetta skal minka munandi um útlátið fyri hvørt flutt tons samanborið við onnur skip hjá reiðarínum.

Samstundis skulu skipini styrkja kappingarførið hjá felagnum og bøta um arbeiðsumstøðurnar hjá sjófólkunum.

Á móttøkuni leygardagin verða røður, skipsdópur og hornblástur. Øll eru vælkomin umborð at síggja nýggja skipið, og ábit verður eisini at fáa.