Nordmenn savnast í dag á Slotspladsen í Oslo, har alsamt fleiri leggja blómur og tendra ljós fyri at vísa kongi Harald virðing og stuðul.

Hetta hendir, eftir at norska kongshúsið hósdag upplýsti, at heilsustøðan hjá konginum er versnað, og at støðan nú er sera álvarsom.

Kong Harald er innlagdur á Rikshospitalet í Oslo, og hansara nærmasta familja er savnað um hann.

Framman fyri Kongsborgina eru í dag alsamt fleiri blómur lagdar. Fólk koma hagar fyri at vísa sín stuðul í eini truplari tíð fyri kongin og norsku kongafamiljuna.

Kong Harald hevur verið innlagdur á Rikshospitalet síðani 17. august.

Sambært teimum seinastu upplýsingunum verður hann viðgjørdur fyri eina bakteriuinfektión í blóðinum, men heilsustøða hansara er versnað hóast viðgerð.

Samstundis er skráin hjá norsku kongafamiljuni avlýst, meðan tey nærmastu hjá konginum eru savnað um hann á sjúkrahúsinum.

Á Slotspladsen halda nordmenn fram við at leggja blómur sum eitt sjónligt tekin um virðing, stuðul og vón í eini støðu, sum hevur rakt stóran part av Noregi.