Øll tilbúgvingin í Føroyum skal nú savnast á einum stovni, nevniliga á Vørn. Sostatt verða teir báðir stovnarnir, Vørn og Arbeiðs- og Brunaeftirlitið, nú umskipaðir.
í hesum sambandi verða tey starvsfólk, sum umsita tilbúgvingarlógina á Arbeiðs- og brunaeftirlitinum nú flutt yvir á Vørn.
Samstundis verður Arbeiðs- og brunaeftirlitið umskipað so at tað verður arbeiðseftirlit burturav.
Endamálið er at savna tilbúgvingarøkið í Vørn og harvið styrkja samskipanina og menningina á økinum, siga Bárður á Steig Nielsen, landsstýrismaður í tilbúgvingarmálum.
– Vit eru í einari tíð, har alsamt størri dentur verður lagdur á tilbúgving og samfelagstrygd, staðfestir Bárður á Steig Nielsen.
– Við at savna hesar uppgávurnar hjá Vørn fáa vit eitt sterkari fakligt umhvørvi og betri møguleikar fyri at samskipa og menna tilbúgvingina í Føroyum, leggur hann afturat.
Samstundis fer Arbeiðseftirlitið at arbeiða miðvísari við fyribyrging, eftirliti og við at bøta um arbeiðsumhvørvið, sigur Margit Stórá.
– Arbeiðstrygd skal raðfestast hægri, hugburðurin á arbeiðsplássum skal broytast, og vit skulu hava eina nullhugsjón, tá tað kemur til arbeiðsvanlukkur sigur hon.
Í sambandi við bygnaðarbroytingina verður eisini stjóraskifti á Arbeiðseftirlitinum. Leivur Persson, sum hevur verið stjóri á Arbeiðs- og brunaeftirlitinum, flytur við til Vørn sum deildarleiðari á tilbúgvingarøkinum.
Tummas Pauli Juul, deildarleiðari, hevur fyribils tikið við sum stjóri á Arbeiðseftirlitinum.
