Tórshavnar býráð fer nú at gera eitt vegastrekki í miðbýnum í Havn, frítt fyri bilar í ávís tíðarskeið.

Talan er um vegastrekkið frá vaglinum niðan á Káta Hornið og ætlanin er at gera hetta strekki bilafrítt í jólmánaðinum í ár og í juli næsta ár.

Í staðin skal tað verða eitt gott øki til frið og samveru í ávís tíðarskeið í vetur og næsta summar, sigur býráðið.

Á hesum strekkinum fer tað bara at verða loyvt at koyra av Tinghúsvegnum, eftir Sverrisgøtu og oman í Tórsgøtu. Samstundis skulu vørubilar sleppa til handlarnar á strekkinum.

Hesi seinastu árini hava verið ymisk tiltøk verið í handilsgøtuni sum  draga fólk til sín og skapa lív í miðbýnum, sigur býráðið.

Men skal tað bera til, er neyðugt at sperra økið fyri almenna ferðslu  ávís tíðarskeið.

Hetta er ein roynd at økja um trivnaðin hjá fólki og umstøðurnar hjá fólki til gongu - og at bøta um umstøðurnar hjá vinnuni í býnum. Samstundis verðu økið ímillum Havnará og Ráðhúsið sett av til hýruvognar.

Annfinn Brekkstein býráðslimur fyri Sambandsflokkin, sigur, at hann tekur ikki støðu til málið fyrr enn býráðið skal taka støðu til tað og teir báðir býráðslimirnir fyri Kommunulistan, Tróndur Sigurðsson og Kári Johansen, taka ikki undir við tí.