Skrásetingin av nýggjum akførum vaks munandi í august. Tilsamans vórðu 135 nýggj akfør skrásett, samanborið við 90 í august í fjør. Tað eru 45 fleiri, svarandi til ein vøkstur á 50 prosent sambært Akstovuni.

Serliga talið á nýggjum persónbilum vaks. Í august vórðu 84 nýggir persónbilar skrásettir, samanborið við 49 sama mánað í 2025. Tað eru 35 fleiri enn í august í fjør.

Vøksturin sæst eisini aftur í samlaðu tølunum fyri fyrstu átta mánaðirnar í ár. Frá januar til og við august eru 1.439 nýggj akfør skrásett. Í sama tíðarskeiði í fjør vóru tey 1.245. Tað eru 194 fleiri akfør, svarandi til ein vøkstur á 15,58 prosent.

Av teimum eru 1.007 persónbilar. Fyrstu átta mánaðirnar í fjør vóru teir 898. Tað er ein vøkstur á 109 bilum ella 12,14 prosentum.

Fleiri vøruvognar og viðfestivognar

Eisini fleiri onnur akfarasløg eru farin fram. Higartil í ár eru 203 nýggir vøruvognar skrásettir, 19 fleiri enn í sama tíðarskeiði í fjør. Talið á viðfestivognum er samstundis vaksið úr 75 í 103, svarandi til 37,33 prosent.

Talið á lendisakførum er tvífaldað úr níggju í 18, meðan talið á lastbilum er trífaldað úr trimum í níggju.

Hagtølini vísa skrásetingina av nýggjum akførum frá januar til august í 2025 og 2026.