Føðideildin á Landssjúkrahúsinum flutti 1. september úr gamla Alexandrines Hospitali og inn í nýggju hølini í H-bygninginum. Í sambandi við flytingina varð skipað fyri móttøku, har Eyðdis Hartmann Niclasen, landsstýriskvinna í heilsu- og orkumálum, helt røðu.

– Hetta er ein dagur, sum vit hava bíðað leingi eftir, segði hon.

Hon lýsti flytingina sum nógv meira enn bara eina flyting tvørtur um sjúkrahúsøkið.

– Tað er næstan sum at flyta úr einari øld og inn í eina aðra.

Betri karmar hjá familjunum

Gamli bygningurin er sambært landsstýriskvinnuni ikki bygdur til tey krøv, sum í dag verða sett til eitt framkomið heilsuverk. Nýggja føðideildin hevur ljós, nútímans og væl útgjørd høli.

Einastovurnar skulu geva nýggjum familjum betri møguleika fyri friði og privatlívi eftir føðingina og betri umstøður at finna seg til rættis í nýggja leiklutinum.

Starvsfólk og foreldur gingu saman

Hátíðarhaldið byrjaði klokkan 10, tá fyrrverandi og núverandi starvsfólk og komandi foreldur gingu frá gomlu føðideildini yvir í H-bygningin. Síðani varð snórurin kliptur.

Landsstýriskvinnan legði samstundis dent á, at nýggir bygningar og nýggj tøkni ikki kunnu standa einsamøll.

– Tað eru starvsfólkini, sum geva bygninginum lív og skapa tryggleikan.