Nýggja kanningin vísir, at 39 prosent av luttakarunum stríðast við sokallaða diabetesstrongd. Tað er sálarliga og kensluliga tyngdin av støðugt at skula handfara eina varandi sjúku.

Úrslitið bendir á, at ein munandi partur av vaksnum føroyingum við typu 1-diabetes kann hava tørv á meira málrættaðum stuðli. Granskararnir mæla til, at sálarliga støðan verður ein grundleggjandi partur av vanligu diabetesviðgerðini.

119 føroyingar tóku lut

Kanningin fevndi um 119 vaksin fólk. Tað svarar til 58 prosent av føroyska bólkinum við typu 1-diabetes. Luttakararnir svaraðu einum netspurnablaði frá juni til august 2023.

Granskararnir nýttu ein sjey spurninga kanningarhátt, sum mátar kensluligu byrðuna av diabetes. Samanhangur varð funnin millum diabetesstrongd og fimm viðurskifti: ungan aldur, nýliga staðfesta diabetes, royking, lága meting av egnari heilsu og ónøgd við kunningina frá heilsustarvsfólki undan viðgerðarbyrjan.

Fyrsta vísindaliga greinin

Greinin er kunngjørd í Scandinavian Journal of Public Health. Tórhalla Vanja Klein Olsen er høvuðsrithøvundur. Hini, sum hava skrivað greinina, eru May-Britt Skoradal, Ingrid Willaing, Herborg Líggjasardóttir Johannesen og Maria S. Petersen.

Vanja Klein Olsen skrivar á LinkedIn, at hetta er hennara fyrsta vísindaliga grein. Hon vónar, at úrslitini kunnu fáa týdning fyri bæði framtíðar gransking og kliniska viðgerð.