Títtleikin av cerebralari paresu, CP, millum børn í Føroyum er lutfalsliga høgur samanborið við onnur háinntøkulond. Tað vísir fyrsta frágreiðingin hjá Heilsustýrinum um CP í Føroyum.

Frágreiðingin fevnir um 35 børn við CP, sum vórðu fødd í Føroyum frá 2009 til 2023 og eru skrásett í CP-skránni hjá Heilsustýrinum. Í miðal hava 3,4 av hvørjum 1.000 børnum, sum verða fødd í Føroyum, CP.

Meira enn tvífalt miðaltalið

Í flestu evropeisku londum liggur títtleikin vanliga millum 1,5 og 2,5 fyri hvørjar 1.000 føðingar. Í háinntøkulondum, eitt nú Norðurlondum, er miðaltalið um 1,6.

Føroyski títtleikin er sostatt meira enn tvífalt so høgur sum miðaltalið í háinntøkulondum. Heilsustýrið leggur tó dent á, at talan er um fáar tilburðir, og frágreiðingin ger onga niðurstøðu um, hví títtleikin er so høgur.

CP er eitt varandi brek, sum stavar frá einum skaða í heilanum og serliga kann ávirka rørslu og motorikk. CP Danmark lýsir eisini CP sum eitt lívslangt brek og vanligastu orsøkina til rørslubrek hjá børnum og ungum í Danmark.

Heilsustýrið vil hava betri skráseting

Heilsustýrið mælir millum annað til at skipa skrásetingina betur, seta ein CPUP-samskipara og økja arbeiðsorkuna innan barnaneurologi og ortopedi.

– Við frágreiðingini hava vit fingið eitt samlað yvirlit yvir CP-økið í Føroyum. Nú er umráðandi at tryggja eina fasta skráseting, so vit eisini frameftir hava dagførda og álítandi vitan, sigur Noomi O. Gregersen, stjóri í Heilsustýrinum.