ES-nevndin hevur lagt fram eina nýggja proteinætlan, sum millum annað skal minka um innflutningin og økja framleiðsluna og nýtsluna av proteini, sum er framleitt í ES. Men fiskur, aling og føði frá sjónum eru ikki fevnd av ætlanini.
European Union Seafood Alliance, EUSeA, sum umboðar fleiri stórar felagsskapir innan evropeiska fiskivinnu og alivinnu, finst hvassliga at avgerðini.
Guus Pastoor, forseti í Seafood Europe, sigur, at talan ikki bara er um nakað, sum er gloymt. Fiskiveiða, aling og fiskavirking eru beinleiðis undantikin proteinpolitikkinum hjá ES.
Óttast minni fígging og politiskan ans
Undantakið hevur ikki við sær nýggjar lógarforðingar, men sambært Pastoor kann tað fáa strategiskan týdning fyri vinnuna.
Politiskar ætlanir hjá ES ávirka millum annað raðfestingar, fígging, gransking, nýskapan, íløgur og framtíðar lóggávu. Tá fiskur og føði úr sjónum standa uttanfyri høvuðsætlanina fyri protein, er vandi fyri, at vinnan fær minni ans á hesum økjum.
Vil hava serliga ætlan fyri sjóføði
Seafood Europe heitir nú á ES um at gera eina greiða virkisætlan fyri sokallaðan Blue Food. Hon skal knýta ymisk politikkøki saman, beina burtur forðingar í regluverkinum og gera tað lættari at menna nýggjar loysnir til vinnuliga framleiðslu og marknað.
Sambært Pastoor kann betri gagnnýtsla av hjávørum frá fiskavirking eisini skapa nýggjar inntøkur, minka um burturkast og geva nýggjar vinnumøguleikar.
