Heilsustýrið hevur sett eina nýggja áminningarskipan í verk, sum skal gera tað lættari hjá foreldrum og verjum at minnast barnakoppsetingarnar. Skipanin sendir sjálvvirkandi boð um Vangan tvær vikur áðrenn, barnið eigur at fáa eina tilmælda koppseting.

Heilsustýrið væntar, at skipanin fer at økja um talið á børnum, sum verða koppsett rættstundis. Foreldur og verjar skulu tó framvegis sjálvi bíleggja tíð hjá kommunulæknanum.

Undirtøkan er minkað

Bakgrundin fyri nýggju skipanini er, at Heilsustýrið fleiri ferðir hevur ávarað um, at undirtøkan fyri teimum tilmældu barnakoppsetingunum er minkað.

Ein hugburðskanning frá 2025 vísti kortini, at føroysk foreldur sum heild taka væl undir við, at børn verða koppsett. Sambært Heilsustýrinum er trupulleikin heldur, at ein alsamt størri partur av foreldrunum av ymsum orsøkum ikki fær koppsetingarnar í lag.

Sjúkurnar kunnu taka seg upp aftur

Barnakoppsetingarætlanin verjir børn móti álvarsligum smittusjúkum sum meslingum, polio og kikhosta. Fleiri av hesum sjúkunum eru nú at kalla útruddaðar í Føroyum, millum annað tí so nógv eru koppsett.

Heilsustýrið vísir tó á, at sjúkurnar framvegis eru til aðrastaðni, eisini í Evropa. Tí kunnu tær taka seg upp aftur í Føroyum, um vit ikki halda fram at koppseta.

Barnakoppsetingarætlanin fevnir um koppsetingar frá trimum mánaðum og upp í 12 ára aldur. Tá verður koppseting móti humanum papillomavirusi, HPV, tilmælt.