ArtiCon handaði 17. juli Sunda kommunu nýggju útstykkingina Býling 2 á Oyrarbakka.

Verkætlanin fevnir um ellivu grundstykki, sum nú eru klár til bústaðarbygging. Eitt felagsøki er eisini gjørt, sum skal savna nýggja býlingin og skapa trivnað í økinum.

Sáttmálin varð undirskrivaður 17. februar, og arbeiðið byrjaði í mars. Sambært ArtiCon varð verkætlanin liðug til avtalaða tíð og fyri avtalaða kostnað.

Upp í níggju fólk við í arbeiðinum

Upp í níggju starvsfólk vóru knýtt at verkætlanini. Arbeiðið fevndi um jørðarbeiði, vegagerð, veitingarleiðingar og annað undirstøðukervi.

Sunda kommuna skipaði fyri móttøku í sambandi við avhendingina. Umboð fyri kommununa, ArtiCon og samstarvsfelagar vóru við.

ArtiCon sigur, at arbeiðsandin hevur verið góður, og takkar kommununi og samstarvsfeløgunum fyri gott samstarv.