Sámal Hansen er farin undir at byggja eitt nýtt 10-mannafar til Kappróðrarfelagið NSÍ. Ætlanin er, at báturin skal standa klárur til komandi kappróðrarár. Hetta verður fimti Eysturoyingur hjá felagnum.

Sámal Hansen hevur áður smíðað Eysturoyingarnar frá 1998 og 2009. Báðir bátarnir hava vunnið fleiri føroyameistaraheiti og skrivað seg inn í føroyska kappróðrarsøgu við nógvum minnisríkum sigrum. Sámal Hansen hevur eisini sjálvur verið partur av manningini.

Eysturoyingur hevur verið millum fremstu 10-mannaførini í Føroyum og hevur vunnið føroyameistaraheitið átta ferðir síðan 1998.

Við nýggja bátinum verður nú arbeitt við næsta ættarliðnum av Eysturoyingi. Hjá Kappróðrarfelagnum NSÍ er stór gleði um, at farið verður undir byggingina, og nógv eru spent at fylgja arbeiðinum komandi mánaðirnar.