Løgtingskvinnan Elsebeth Mercedis Gunnleygsdóttur hevur sett Eyðdis Hartmann Niclasen, landsstýriskvinnu í heilsu- og orkumálum, ein nýggjan § 52a-fyrispurning um MR-skanning av bróstum á Klaksvíkar Sjúkrahúsi.

Skuldu vera klár eftir summarfrítíðina

Fyrr í ár upplýsti landsstýriskvinnan, at útgreiningararbeiðið og fyrireikingarnar til at seta MR-skanning av bróstum í verk væntandi fóru at vera liðug eftir summarfrítíðina.

Nú summarfrítíðin er farin aftur um bak, vil Elsebeth Mercedis Gunnleygsdóttur hava greiðu á, hvussu langt arbeiðið er komið.

Spyr um fyrstu skanningarnar

Hon spyr millum annað, um fyrireikingarnar eru lidnar, og um MR-skanningar av bróstum longu eru gjørdar í 3 Tesla-skannaranum á Klaksvíkar Sjúkrahúsi.

Er svarið nei, vil hon hava at vita, nær fyrstu MR-skanningarnar av bróstum kunnu væntast at verða settar í verk.