Nýggi útróðrarbáturin Maru kom seint týskvøldið til Strendur. Tað upplýsir Sjóvar kommuna.

Felagið Aron, sum er skrásett á Strondum, eigur bátin og skal reka hann. Maru er bygdur í Litava og er av slagnum Seigur.

Lastar 25.000 pund

Maru er 12,4 metrar langur og 4,5 metrar breiður. Hann lastar 25.000 pund og hevur ein 294 kW Scania-motor.

Báturin hevur síðuskrúvur bæði framman og aftan og er sambært kommununi sterkt bygdur.

Fyrsti túrur um ein mánað

Enn skal egningarmaskina og onnur útgerð setast upp og gerast klár. Ætlanin er, at Maru fer fyrsta túrin um ein mánað.

Tríggir til fýra mans verða við bátinum.