Dana V skal virka í arktiskum havøkjum og skal eftir ætlan geva granskarum nógv betri møguleikar at kanna lívið undir sjónum uttan at órógva óneyðugt.
Skipið fær tveir diesel-elektriskar motorar, sum larma munandi minni enn vanligir skipsmotorar. Harumframt verður ein battarískipan umborð, sum eisini ger tað gjørligt at sigla í nærum fullkomiligari tøgn.
Bygt til tøgn undir sjónum
Sambært Jesper Sandager, skipara og deildarleiðara á DTU Aqua, hevur tað verið ein høvuðsmálsetningur at minka um larm.
– Jú minni larm vit gera, tess betri atgongd fáa vit til lívið undir vatnskorpuni, sigur hann.
Dana V skal verða felags granskingarpallur fyri havfrøðiliga, maritima og jarðfrøðiliga gransking í ríkisfelagsskapinum. Skipið skal eisini savna dátur um fiskastovnar, havumhvørvi og marinar tilfeingiskeldur.
Skal útbúgva komandi granskarar
Ein annar týdningarmikil leiklutur hjá Dana V verður útbúgving. Umborð verða møguleikar hjá lesandi at gera royndir til havs.
Skipið verður 70 metrar langt, vigar 2.545 tons og hevur pláss fyri 38 fólkum. Tað fær Polar Class 6-flokking, sum merkir, at tað kann sigla alt árið í ísi, sum er upp til 50 sentimetrar tjúkkur.
Tað er spanska skipasmiðjan Construcciones Navales P. Freire sum byggir skipið sum skal avloysa verandi havrannsóknarskipið Dana IV, tá tað verður latið í heysti 2027.
