Sernám hevur sett á stovn eina nýggja, opna ráðgeving fyri starvsfólk á dagstovnaøkinum. Endamálið er at geva lætta atgongd til óformliga fakliga ráðgeving, áðrenn avbjóðingar vaksa seg stórar.

Ráðgevingin er dulnevnd

Ráðgevingin er opin fríggjadagar klokkan 10–12. Starvsfólk kunnu ringja á 360 200 við fakligum spurningum, ivamálum og avbjóðingum úr gerandisdegnum.

Samrøðurnar verða ikki skjalførdar. Starvsfólk skulu hvørki upplýsa sítt egna navn, navnið á dagstovninum ella upplýsingar, sum kunnu eyðmerkja einstøk børn.

Talan er ikki um málsviðgerð, og ráðgevingin kann heldur ikki brúkast til støðutakan í einstøkum málum, visitatión ella skráseting hjá Sernámi.

25 minuttir til hvørja samrøðu

25 minuttir verða settir av til hvørja samrøðu. Vikuliga ber til at fáa ráðgeving innan talu og samskifti, sálarfrøði og sernámsfrøði.

Ráðgeving innan ergoterapi, sersamskifti og tekn til talu er tøk eina ferð um mánaðin fram til jóla.