Seinastu dagarnar hevur álvarsligur ófriður herjað fleiri øki í og kring Belfast eftir eina drápsroynd í norðara parti av býnum.
Tað, sum byrjaði sum mótmæli og samkomur, menti seg til harðligar samanbrestir, har bæði heim, akfør og almenn ogn vórðu fyri álopum.
Bólkar av maskeraðum fólki gjørdu mótmælini til harðligan ófrið. Fleiri bilar og bussar brensu, og steinar, bensinbumbur og annað rusk varð kastað móti løgregluni. Eisini vórðu bygningar og onnur ogn skadd ella oyðiløgd í sambandi við ófriðin.
Í fleiri økjum vórðu hús álopin og sett í brand. Familjur noyddust at flýggja úr heimunum fyri at sleppa undan eldinum og ótryggleikanum, meðan sløkkiliðið í fleiri førum bjargaði fólki úr brennandi húsum.
Mikukvøldið var serliga ófriðarligt í Glengormley, har 12 løgreglufólk vórðu løstað. Til samans vórðu 16 fólk handtikin í sambandi við ófriðin.
Løgreglan nýtti bæði vatnkanón og 20 gummikúlur fyri at fáa tamarhald á støðuni. Smærri hendingar vóru eisini í Portadown, har tvey fólk síðani eru ákærd.
Sama kvøld fekk sløkkiliðið ikki færri enn 82 neyðarkall um eldar í bilum, bygningum og ruskbingjum, sum undirstrikaði umfangið av ófriðinum.
Hóast spenningurin hevði verið stórur undan hósdegnum, endaðu mótmæli í Whiteabbey og á Malone Road í Belfast friðarliga.
Løgreglan hevði fyrireikað seg upp á møguligar samanbrestir við eyka manning, hundapatruljum og vatnkanónum, men tað gjørdist ikki neyðugt at seta hesi tiltøk í verk.
Løgreglan í Norðurírlandi, Police Service of Northern Ireland, hevur tó boðað frá, at bæði vatnkanónir, eyka løgreglufólk og hundapatruljur framvegis eru tøkar, um nýggjur ófriður skuldi tikið seg upp.
Myndugleikarnir hava harðliga fordømt harðskapin og heitt á fólk um at vísa afturhald. Samstundis verður dentur lagdur á, at hendingarnar verða kannaðar sum álvarslig brotsmál, og at tey, sum hava verið partur av ófriðinum, verða drigin til svars.
Ófriðurin hevur skapt ótta og ótryggleika í teimum raktu økjunum, men friðarligu mótmælini hósdagin geva vón um, at støðan nú er við at koma undir tamarhald.
