Fyritøkan Orkað hevur rindað eina bót á 30.000 krónur fyri brot á marknaðarføringslógina, eftir at Brúkaraumboðið fekk fráboðanir um óynsktar uppringingar og sms-boð frá fyritøkuni til borgarar.

Sambært Brúkaraumboðnum hevur Sp/f 16, sum rekur virksemi undir navninum Orkað, ringt og sent sms-boð til borgarar við tilboði um skorsteinsreinsan. Í boðunum varð sagt, at fyritøkan var í økinum.

Brúkaraumboðið vísir á, at slíkt samskifti ikki er loyvt sambært § 6 í marknaðarføringslógini, uttan so at borgarin frammanundan hevur givið samtykki. Lógin fevnir um marknaðarføring við telefon, sms og telduposti.

Ringdu fleiri ferðir til somu borgarar

Málið varð mett sum álvarsamt, tí at fyritøkan sambært Brúkaraumboðnum í summum førum hevði ringt fleiri ferðir til somu borgarar, hóast tey høvdu biðið um ikki at verða uppringd aftur.

Brúkaraumboðið valdi tí at senda málið til fútan við áheitan um at reisa ákæru móti fyritøkuni.

Orkað hevur síðani viðurkent brotið og rindað bótina á 30.000 krónur. Sambært Brúkaraumboðnum varð málið meldað í januar 2024, og bótin varð goldin 3. apríl sama ár.