Tingkvinnan Sunnvá Dahl Høgfeldt vil hava Jacob Vestergaard, landsstýrismann í vinnumálum, at greiða frá, hvørjar reglur eru galdandi fyri el-súkklur í føroysku ferðsluni.

Hon hevur sett landsstýrismanninum ein skrivligan fyrispurning eftir § 52a í Tingskipanini.

Spyr um ferð og aldursmark

Tingkvinnan vil vita, hvørjar ferðslureglur eru galdandi fyri el-súkklur, og hvør hámarksferðin er.

Hon spyr eisini, um aldursmark er fyri at koyra á el-súkklu, og um ymiskar reglur eru galdandi fyri ymisk sløg av el-súkklum.

Børn og ung brúka el-súkklur

Bakgrundin er, at el-súkklur eru vorðnar alsamt vanligari í Føroyum. Sambært fyrispurninginum síggjast eisini børn og ung koyra á el-súkklu.

Sunnvá Dahl Høgfeldt vísir á, at foreldur og onnur eru í iva um, hvørjar treytir eru galdandi. Hon vil tí hava reglurnar nágreinaðar, so greitt verður, hvør hevur loyvi at koyra á el-súkklu, og um serlig aldursmørk ella aðrar treytir eru galdandi.