Studni hevði ikki kannað ein avgerandi spurning, áðrenn stovnurin noktaði einum lesandi tríggjar mánaðir í eyka lestrarstuðli vegna sjúku. Tað staðfestir Føroya Kærustovnur, sum hevur sent málið aftur til nýggja viðgerð.

Málið snýr seg um ein lesandi, sum var sjúkur undir eini útbúgving í Danmark og nú er undir útbúgving í Føroyum.

Studni noktaði umsóknini við teirri grundgeving, at stovnurin ikki hevði heimild til at játta eyka stuðul við støði í teimum skjølum, sum vóru løgd fram.

Kærarin var ósamdur og helt fast við, at Studni hevði tulkað føroysku lóggávuna ov trongt.

Manglaði stuðul í tríggjar mánaðir

Kærarin las í Danmark árini 2018–2022 og er nú undir útbúgving í Føroyum.

Hann hevði fingið lestrarstuðul í tilsamans seks ár, sum er vanliga hámarkið fyri hægri útbúgvingar.

Sambært Studna hevði hann 19 mánaðir eftir av stuðulskvotuni, men manglaði tríggjar mánaðir fyri at hava stuðul undir allari útbúgvingini.

Hann søkti tí um undantak vegna sjúku undir lestrinum í Danmark.

Í kæruni frá 10. juni 2026 skrivar hann:

– Eg kæri hesa avgerð, tí eg meti ikki, at málið er nóg væl upplýst ella rættiliga mett.

Hann vísir á, at hann hevur lagt læknaváttanir og samskifti við danskar myndugleikar fram fyri Studna.

Kom í klemmu millum tveir myndugleikar

Kærarin heldur, at hann er komin í eina støðu, har hvørki føroyskir ella danskir myndugleikar taka støðu til umsóknina.

Tað merkir, at eg komi í eina serliga støðu: Donsku myndugleikarnir kunnu ikki viðgera málið, tí eg nú lesi í Føroyum, meðan Studni noktar at játta undantak, tí eingin endalig donsk avgerð um 3 eyka klipp fyriliggur.

Sambært kæraranum kunnu donsku myndugleikarnir ikki viðgera umsóknina, tí hann ikki longur er innskrivaður í eini útbúgving í Danmark, sum gevur rætt til danskan lestrarstuðul.

Hann heldur tí, at Studni eigur at gera eina sjálvstøðuga meting av sjúkuviðurskiftunum.

Studni vísti til danskar reglur

Studni helt fast við, at sjúkan var undir eini danskari útbúgving, og at tað tí var uppgávan hjá donskum myndugleikum at taka støðu til møguligan eyka stuðul.

Stovnurin vísti eisini á vandan fyri, at kærarin kundi fáa undantak tvær ferðir fyri somu sjúku.

Kærarin mótmælti hesi grundgeving.

– Umsóknin snýr seg einans um, hvørt eg, sambært føroysku lógini um lestrarstuðul, havi rætt til undantak frá áramálsregluni vegna sjúku, skrivar kærarin.

Kærarin: Ov trong tulking av lógini

Í viðmerkingum frá 14. juli 2026 finst kærarin at avgerðini hjá Studna.

– Ein generell avvísing við tilvísing til, at sjúkan er farin fram undir útlendskum lestri, tykist tí byggja á eina ov tronga tulking av heimildini, heldur kærarin.

Hann leggur afturat:

– Eg vil eisini undirstrika, at eg ikki eri ósamdur í sjálvari uppgerðini av brúktum stuðulsmánaðum. Kæran snýr seg einans um metingina av, um eg havi rætt til undantak vegna skjalprógvaða sjúku.

Á fundi hjá Føroya Kærustovni 3. september 2026 førdi kærarin eisini fram, at ikki eigur at verða gjørdur munur á føroyingum, sum lesa í Danmark, og teimum, sum lesa í Føroyum, tá ræður um møguleikan at fáa undantak frá stuðulsmarkinum.

Kærustovnurin sendir málið aftur

Føroya Kærustovnur tók avgerð 3. september 2026.

Kærustovnurin metir, at Studni ikki hevur viðgjørt, um lestrartíðin í útbúgvingini, sum kærarin nú er undir, er longd vegna sjúku sambært § 18, stk. 4, í lógini um lestrarstuðul.

Tí hevur Kærustovnurin avgjørt at senda málið aftur til Studna.

Avgerðin merkir ikki, at kærarin hevur fingið játtað tríggjar mánaðir í eyka stuðli. Studni skal fyrst viðgera málið av nýggjum.