Umboð úr teimum 24 limaoyggjunum í IIGA og úr altjóða oyggjaleikanevndini eru í hesum døgum á undanvitjan í Føroyum.

Í dag vitjaðu tey í Runavíkar kommunu. Har høvdu limaoyggjarnar verkstovu í Løkshøll, og ferðalagið vitjaði eisini Bylgjuna, har fimleikakappingarnar skulu vera, tá Oyggjaleikirnir koma aftur til Føroya í 2027.

Runavík fær týðandi leiklut

Tóri Højgaard, virkandi borgarstjóri, beyð gestunum vælkomnum, tá kommunan bjóðaði ferðalagnum døgurða.

Hann segði, at tað er bæði ein heiður og ein ábyrgd, at ítróttastøð í kommununi eru vald til Oyggjaleikirnar.

Runavíkar kommuna hevur umleið 4.500 íbúgvar og er triðstørsta kommuna í Føroyum.

Ítrótturin stendur sterkur

Í Runavíkar kommunu eru 20 skrásett ítróttafeløg við tilsamans umleið 3.300 limum.

Sambært Tóra Højgaard vísir hetta, at ítróttur ikki er eitt hjávirksemi í kommununi, men ein týðandi partur av lokalsamfelagnum.

Hann vísti eisini á, at Oyggjaleikirnir krevja gott samstarv millum kommunur, ítróttasambond, feløg, sjálvboðin og fyriskiparar.