Strandingurin Pauli Rasmussen fær nú altjóða uppmerksemi, áðrenn føroyska U20-landsliðið fer undir EM-endaspælið í Rumenia mikudagin.
Evropeiska hondbóltssambandið, EHF, hevur sett 19 ára gamla bakkspælaran á ein lista við fimm spælarum, sum eru serliga verdir at fylgja í kappingini.
EHF vísir á, at Pauli Rasmussen hevur verið toppskjútti hjá StÍF, eisini í Evropa, og at hann skoraði 27 mál fyri Føroyar í U19-HM í fjør.
Sambært EHF verður hann aftur hesa ferð eitt av týdningarmestu álopsvápnunum hjá Føroyum.
Føroyar byrja móti Serbia
Pauli Rasmussen hevur seinastu árini gjørt vart við seg í heimligu kappingini, í Evropa og á føroysku landsliðunum. Hann hevur eisini fingið sínar fyrstu minuttir á A-landsliðnum.
Eftir EM-endaspælið skiftir hann úr barndómsfelagnum StÍF til danska felagið TMS Ringsted.
Føroyar eru í bólki B saman við Serbia, Sveis og Turkalandi. Fyrsti dysturin verður móti Serbia mikudagin klokkan 17.30. Síðani spæla Føroyar móti Turkalandi hósdagin og Sveis leygardagin.
