Lina Ejlertsson, doktari í fólkaheilsuvísindi við universitetið í Lund í Svøríki hevur kannað heilsustøðuna hjá starvsfólkunum í heilsuverkinum í Skáni í Svøríki. Meira enn 600 starvsfólk í 26 ymsum heilsudeplum vóru við í kanningini, bæði røktarstarvsfólk, læknar, sálarfrøðingar, terapeutar og skrivstovufólk. Tað, sum granskarin vildi vita, var, hvussu arbeiðsumhvørvið ávirkaði heilsustøðuna hjá ymsu starvsfólkabólkunum.
Niðurstøðan er greið. Ein góð pausumentan á arbeiðsplássinum er bæði góð fyri heilsustøðuna hjá starvsfólkunum og fyri arbeiðsumhvørvið sum heild.
-Royndirnar vísa, at har tiltøk verða sett í verk fyri, at arbeiðsfólkið kann steðga á fyri at savna seg í einum annars strongdum arbeiðsdegi, har trívast tey eisini betur, sigur Lina Ejlertsson við forskning.no
Onnur viðurskifti, sum skapa eitt gott arbeiðspláss, eru fjølbroyttar arbeiðsuppgávur, felagsskapurin á arbeiðsplássinum og so tað, at ein megnar sína arbeiðsuppgávu.
Hon vísir á, at tá mest er at gera á arbeiðsplássinum og mest verður strongt á, tá er tørvurin á pausum eisini størstur. Tí eiga leiðarar og stjórar at skipa soleiðis fyri, at pausur eru lógligur partur av arbeiðsdegnum. Tað skapar eitt betri arbeiðsumhvørvi, betri samanhald millum starvsfólkið og í síðsta enda eisini eina betri heilsustøðu hjá øllum.
Kelda:forskning.no
.png){kind=logo}
