Hóttanin fyri russiskari sabotasju í Danmark er høg, og PET sær ítøkilig tekin um, at Russland leggur til rættis og fyrireikar skemdarverk. Serliga fyritøkur í verjuídnaðinum og fyritøkur, sum hava samband við hernaðarliga stuðulin til Ukraina, eru útsettar.
PET leggur tó dent á, at fregnartænastan ikki hevur upplýsingar um nakað ítøkiligt álop, sum er í umbúna á einum ávísum staði ella einum ávísum tidspunkti.
Verva fólk á netinum
Sambært PET er ein partur av russiska arbeiðsháttinum at verva fólk á netinum til smærri uppgávur. Tað kann fara fram á sosialum miðlum, spælpallum og boðtænastum sum Telegram.
Uppgávurnar kunnu eitt nú vera at taka myndir ella upptøkur av fyritøkum, goymslum, akførum ella atkomuviðurskiftum. Gjald kann millum annað verða latið í kryptogjaldoyra.
PET heitir á viðkomandi fyritøkur um longu nú at meta um trygdina og bera skjótt at, um tær varnast óvanligar hendingar ella óvanligan áhuga fyri virkseminum.
