Heilivágsfyritøkurnar Pfizer og BioNtech hava nú gjørt avtalu við altjóða olympisku nevndina um at veita koppseting til allar íðkararnar til komandi olympisku leikirnar og paralympisku leikirnar í Tokyo.
Tað boðar olympiska nevndin frá á heimasíðuni í dag.
Olympiska nevndin sigur, at avtalan er gjørd við heilivágsfyritøkurnar um at veita skamtar til allar íðkararnar, venjararnar og starvsfólkini, ið skulu taka lut á leikunum, og at arbeitt verður í samstarvi við olympisku nevndirnar og myndugleikarnar í einstøku limalondunum um at fáa koppsetingarnar avgreiddar.
- Hetta er ikki bert til at skapa eitt trygt umhvørvi til íðkararnar, men eisini av virðing fyri íbúgvunum í Japan, sigur altjóða olympiska nevndin.
- Vit heita á allar íðkarar og luttakandi ferðalið til komandi olympisku leikir og paralympisku leikir at vera fyrimyndarlig og lata seg koppseta, tá tað ber til, sigur Thomas Bach, forseti í altjóða olympisku nevndini.
Altjóða olympiska nevndin ger kortini greitt, at talan er ikki um skamtar, ið verða tiknir aðrastaðni frá, men at skamtarnir koma aftrat verandi koppsetingarkvotum.
- At veita koppseting til íðkarar á leikunum er ein av týðandi mátunum at tryggja, at leikirnir eru so tryggir og góðir sum gjørligt, sigur Ugur Sahin, ið er ein av stovnarunum hjá BioNTech.
