So er tað greitt, at Føroyar í HM endaspælinum í manshondbólti, sum verður í januar 2027, fara at spæla í Magdeburg.
Lutakastið lagaði seg soleiðis, at Føroyar í innleiðandi umfarinum fara at spæla ímóti Portugal, Póllandi og Algeria.
Føroyar eru í øðrum styrkisraði. Portugal er í fyrsta styrkisraði, Pólland er í triðja styrkisraði, og Algeria er í fjórða styrkisraði.
Pólland og Algeria verða roknað at vera millum góðu liðini í ávikavíst triðja og fjórða styrkisraði.
Bólkarnir
Bólkur A: Týskland, Serbia, Tunesia og Uruguay
Bólkur B: Egyptaland, Italia, Kap Verde og Saudi-Arabia
Bólkur C : Kroatia, Spania, Kili og Turkaland
Bólkur D: Argentina, Frakland, Brasilia og Kuwait
Bólkur E: Svøríki, Norra, Grikkaland og Katar
Bólkur F: Portugal, Føroyar, Pólland og Algeria
Bólkur G: Danmark, Slovenia, USA og Angola
Bólkur H: Ísland, Norðurmakedonia, Bahrain og Japan
Hondbóltssamband Føroya skrivar soleiðis, nú lutakastið hevur verið:
Portugal, FØROYAR, Pólland og Algeria
Tað er nú greitt, at Magdeburg verður heimstaðurin hjá føroyska manslandsliðnum til innleiðandi bólkaspælið í HM-endaspælinum í Týsklandi í januar 2027. Ein møgulig millumrunda verður leikt í Hannover. Við lutakastinum í München í dag gjørdist eisini greitt, at mótstøðuliðini verða Portugal, Pólland og Algeria.
Innleiðandi dystirnir hjá Føroyum liggja soleiðis:
Hósdagin 14. januar: Føroyar – Algeria
Leygardagin 16. januar: Føroyar – Pólland
Mánadagin 18. januar: Portugal – Føroyar
Dystirnir verða leiktir í GETEC Arena, sum tekur uml. 6.500 áskoðarar. Sum áður kunnað um, so eru sera nógv atgongumerkið longu seld, bæði til innleiðandi bólkaspælið og millumumfarið. Tað er tískil skilagott, at keypa sær atgongumerkir beinanvegin á heimasíðuni www.handball2027.com
Til seinasta EM, í 2026, gjørdist Portugal nummar 5, Pólland nr. 21. Føroyar gjørdust nummar 13.
Til seinasta HM, sum var í 2025, gjørdist Portugal nr. 4, Pólland nr. 25 og Algeria nr. 30. Føroyar vunnu seg ikki til endaspælið.
Um Føroyar gerðast millum trý tey bestu liðini í bólkinum, skulu Føroyar víðari til millumumfarið í Hannover. Liðið, sum verður nummar fýra í bólkinum, skal spæla Presidents Cup í Magdeburg. Atgongumerkini til millumumførini eru eisin sett til sølu á www.handball2027.com
