Áhugin fyri Arktis veksur skjótt, og tað setir størri krøv til Danmark, Grønland og Føroyar.

Fleiri granskarar óttast, at Ríkisfelagsskapurin kann missa fótafestið, um samstarvið um arktiska gransking ikki verður styrkt.

Serliga verður víst á, at Arktis er vorðið eitt týdningarmiklari øki í altjóða politikk og trygd. Samstundis gerst gransking og vitan um økið, alsamt meira politiskar.

Forum for Arktisk Forskning heldur tí, at Danmark, Grønland og Føroyar eiga at arbeiða tættari saman. Endamálið er at tryggja, at Ríkisfelagsskapurin hevur neyðuga vitan og førleika til at vera við, tá framtíðin hjá Arktis verður umrødd.

Fram ímóti næsta altjóða Polárárinum verður serliga tørvur á nýggjari vitan um veðurlagsbroytingar, náttúru og samfeløg í Arktis.

Sambært granskingarumhvørvinum er hetta tí ikki bara ein spurningur um gransking, men eisini um at tryggja Ríkisfelagsskapinum eina sterka rødd í einum Arktis, sum fær alsamt størri altjóða týdning.