Skipað verður í ár fyri tveimum summartúrum við Draganum úr Klaksvík norður til Kalsvíkar, sum liggur norðast á Kalsoynni. Tað er Visit North sum stendur fyri tiltakinum.

Á ferðini fáa luttakararnir høvi at uppliva eitt serstakt føroyskt landslag frá sjónum, har brøttu fjøllini á Kalsoynni og Kunoynni reisa seg úr havinum. Á leiðini verður eisini siglt fram við fuglabjørgum, har eitt fjølbroytt fuglalív heldur til.

Umborð verður eisini tónleikur á skránni. Rani Nolsøe fer at framføra við gittara og sangi, og syngja løg um Føroyar og føroysku náttúruna.

Túrarnir verða fríggjakvøldini 24. og 31. juli frá klokkan 18.00 til 21.00.