Fróðskaparsetur Føroya hevur aftur í ár boðið miðnámsskúlanæmingum at royna seg sum granskarar.
Tvær tær seinastu vikurnar í oktober vitjaðu 187 næmingar Náttúruvísindadeildina. Har sluppu teir sjálvir at gera vísindaligar royndir við útgerð, sum verður brúkt á universitetinum.
Átakið skal vekja áhugan fyri lívfrøði og vísa ungum, hvørjir útbúgvingarmøguleikar eru í Føroyum.
Frá einari skúlavitjan til landsumfatandi átak
Tað byrjaði við einum flokki av Glasi, sum hevði lívfrøði á A-stigi. Næmingarnir sluppu at gera eina starvsstovuroynd, og vitjanin eydnaðist so væl, at aðrir lærarar eisini vildu senda sínar næmingar á Setrið.
Síðani er átakið ment og víðkað.
Í fjør vórðu allir miðnámsskúlar í Føroyum bodnir at senda flokkar við lívfrøði á A- ella B-stigi á vitjan.
Tá meldaðu 211 næmingar seg til. Í ár vóru teir 187, sum eru 24 færri enn í fjør.
Næmingarnir koma úr Havn, Vestmanna, Suðuroy, Kambsdali og Klaksvík.
Kanna kynskromosom á starvsstovuni
Á vitjanini gera næmingarnir eina PCR-roynd, har teir kanna kynskromosom.
Royndin er lagað til miðnámsskúlanæmingar og gevur teimum innlit í vísindaligar arbeiðshættir.
Samstundis fáa teir kunning um lívfrøðisútbúgvingarnar og gerandisdagin hjá teimum, sum lesa á Setrinum.
Sambært Fróðskaparsetrinum eru fleiri næmingar, sum áður hava vitjað starvsstovurnar, seinni farnir undir at lesa lívfrøði á Setrinum.
Málið er at fáa fleiri ung at síggja møguleikarnar fyri hægri útbúgving í Føroyum.
