Eitt ferðalag úr Sisimiut í Grønlandi vitjaði 3. september Klaksvík. Endamálið var at fáa innlit í arbeiðið við børnum og ungum og at skifta vitan um trivnað og samstarv millum kommunur, skúlar og aðrar myndugleikar. Sisimiut er vinarbýur Klaksvíkar.

Fingu innlit í skúlaarbeiðið

Í ferðalagnum vóru kommunustýrislimir og umboð fyri fyrisitingina í Qeqqata Kommunu.

Á Skúlatrøð vísti Jónleif Johannesen skúlastjóri gestunum runt og greiddi frá virkseminum á skúlanum. Síðani vóru framløgur í Varpinum um arbeiðsøki og átøk á barna- og ungdómsøkinum.

Vitjaðu stovnar fyri børn og ung

Seinnapartin vitjaði ferðalagið frítíðarskúlan Snjallubjallu, barnagarðin Baldursbrá á Norðoyri og ungdómshúsið Húsið. Har varð greitt frá arbeiðsháttum, avbjóðingum og møguleikum.

Sambært Klaksvíkar kommunu staðfesti vitjanin góða sambandið millum Klaksvík og Sisimiut og gav samstundis nýggjan íblástur.