Heilsu- og orkumálaráðið hevur lýst starvið sum varastjóri við læknafakligari bakgrund í Sjúkrahúsverkinum leyst. Starvið skal setast skjótast gjørligt, og umsóknarfreistin er 28. september.
Varastjórin verður ovasti ábyrgdarhavandi lækni í føroyska sjúkrahúsverkinum og skal samstundis virka sum læknafakligur ráðgevi hjá Heilsu- og orkumálaráðnum.
Fær ábyrgd av rakstri og menning
Starvið fevnir millum annað um strategiska ráðlegging, yvirskipaðan læknafakligan rakstur og menning í Sjúkrahúsverkinum. Varastjórin skal eisini hava samábyrgd av fíggjarætlanunum og vera við til at styrkja samstarvið millum sjúkrahúsini, primeru heilsutænasturnar, almannaverkið og útbúgvingarstovnar.
Umsøkjarin skal vera serlækni og hava útbúgving ella royndir innan leiðslu og fyrisiting. Harumframt verður kravt innlit í fíggjarstýring, sjúkrahúsvirksemi og heilsuøkið sum heild.
Stórt ábyrgdarøki
Sjúkrahúsverkið hevur umleið 1.200 ársverk, 169 sengur og ein árligan rakstur á umleið 1,2 milliardir krónur. Árliga eru umleið 12.000 innleggingar, 130.000 ambulantar viðgerðir og 5.000 skurðviðgerðir.
