Síðan 1. juli hava føroyskir bilførarar kunnað víst koyrikortið í Skjáttuni, verða teir steðgaðir í ferðsluni í Danmark. Talgilda koyrikortið kann eisini brúkast, tá ið bilur skal leigast.

Tað merkir, at føroyskir bilførarar ikki longur noyðast at hava fysiska koyrikortið við sær í Danmark, um teir hava telefonina og koyrikortið í Skjáttuni.

Samstundis er danska talgilda koyrikortið góðkent í Føroyum. Hetta er fyrstu ferð, at talgild koyrikort verða góðkend tvørtur um landamørk.

Fleiri prógv í somu app

Skjáttan er ein føroysk app, sum hýsir talgilda koyrikortinum, samleikakortinum og øðrum almennum loyvum. Eitt nú kunnu sjóvinnuprógv eisini liggja í appini.

Góðkenningin í Danmark er liður í arbeiðinum hjá Talgildu Føroyum at gera føroyskar talgildar loysnir nýtiligar í gerandisdegnum – eisini uttan fyri Føroyar.