Stríðið um vatnið til smoltstøðina hjá Bakkafrost í Skálavík er nú aftur komið á politiska dagsskránna.

Liljan Weihe, løgtingskvinna, hevur sett Jacob Vestergaard, landsstýrismanni í vinnumálum, ein skrivligan § 52a-fyrispurning um tænastuboð, sum vórðu givin Búnaðarstovuni í málinum. Fyrispurningurin er dagfestur 5. august.

Hon vil millum annað hava landsstýrismannin at svara, um boðini vóru lóglig og saklig, hvørjar sakligar grundgevingar vóru fyri teimum, og um ein freist upp á bert hálvan annan tíma var rímilig.

Eisini spyr hon, hvar málið stendur nú.

Bert hálvur annar tími at fremja boðini

Sambært viðmerkingunum í fyrispurninginum gav Jacob Vestergaard fríggjadagin 29. mai klokkan 13.31 aðalstjóranum tænastuboð. Búnaðarstovan skuldi fáa boð um at taka seg úr málinum um smoltstøðina fyri klokkan 15 sama dag.

Liljan Weihe vísir í hesum sambandi til eina grein hjá Frihedsbrevet.fo. Har varð sagt, at sakførarin hjá festaranum stutt frammanundan hevði vent sær beinleiðis til landsstýrismannin.

Búnaðarstovan gjørdi tó ikki eftir boðunum, men kannaði í staðin, um heimild var fyri teimum. Sambært endurgevingini í fyrispurninginum ivaðist stovnurin stórliga í lógligheitini av tænastuboðunum.

Vinnumálaráðið tók boðini aftur

Fáar dagar seinni vórðu boðini tikin aftur.

Týsdagin 2. juni fekk Búnaðarstovan mótboð og varð biðin um at síggja burtur frá tænastuboðunum. Grundgevingin frá Vinnumálaráðnum var sambært fyrispurninginum, at ráðið eftir nærri viðgerð metti, at eingin heimild var at geva boðini.

Frihedsbrevet.fo hevði frammanundan lýst gongdina sum eina óvæntaða vend, har landsstýrismaðurin fyrst gav boð um, at Búnaðarstovan skuldi taka seg úr málinum, men síðani tók boðini aftur.

Drúgt stríð um vatnið

Málið snýr seg í grundini um, hvør hevur ræðisrættin til vatnið, sum nýggja smoltstøðin hjá Bakkafrost skal brúka.

Hagaeigararnir hava ikki viljað lata ræðisrættin frá sær. Tá eingin semja fekst, tók Búnaðarstovan ræðið av festaranum. Málið hevur eisini verið í Føroya Rætti, sum vísti tí frá sær, og fyri landbúnaðarstevnu.

Bakkafrost hevur hinvegin sagt, at viðurskiftini um vatnið eru avgreidd í samráð við Skálavíkar kommunu eftir galdandi byggi- og býarsamtykt.