Naviair leitar nú eftir nýggjum starvsfólki til AFIS-tænastuna á Vága Floghavn. Tað er ikki krav, at umsøkjarin longu er útbúgvin AFIS-operatørur. Naviair bjóðar nevniliga útbúgvingina, sum byrjar í januar 2027.
Undir útbúgvingini er lønin umleið 26.700 krónur um mánaðin. Eftir lokna útbúgving er byrjunarlønin umleið 41.800 krónur um mánaðin, umframt 18 prosent í eftirløn. Starvssetanin er sambært donskum sáttmálum og avtalum.
Fýra mánaðir í Malmø
Ástøðiligi parturin av útbúgvingini verður á EPN í Malmø frá umleið 10. januar til 20. apríl 2027. Síðan verða umleið seks mánaðir av starvsvenjing í Vágum.
Arbeiðið fevnir millum annað um loftferðslukunning, alarmering og veðureygleiðing. Harumframt eru uppgávur í sambandi við altjóða flúgving, leiting og bjarging, og fráboðanartænastu.
Einsamallur í torninum
Í lágárstíð er tornið í Vágum einmannað, og tí skal starvsfólkið trívast við at arbeiða einsamalt. Í háárstíð, tá ferðslan er størst, verður miðað eftir at hava tvey fólk á vakt í senn.
Arbeiðsvikan er í miðal 37 tímar, og arbeitt verður í skiftandi vaktum, sum eisini umfata tilkallivaktir. Starvssetanin er treytað av, at umsøkjarin kann trygdargóðkennast til „Loyniligt“ (NATO SECRET) og lýkur ásettu heilsutreytirnar.
Umsóknarfreistin er 25. oktober 2026, og ætlanin er, at starvið verður sett 11. januar 2027.
