Dansk-norski Peter Tulinius Krarup er nú formliga byrjaður sum stjóri í Norðurlandahúsinum í Føroyum. Hann flutti til Føroya úr Norður-Noregi og hevði í dag sín fyrsta arbeiðsdag í nýggja starvinum. Hann er tíggjundi stjórin í søgu hússins.

Hann tekur við eftir norsku Gunn Hernes, sum hevur verið stjóri í átta ár.

Drúgvar altjóða royndir

Peter Tulinius Krarup er føddur í Haslev í 1970 og hevur lisið og arbeitt í Danmark, Noregi, Onglandi og Týsklandi. Síðan 2019 hevur hann verið stjóri í Harstad Kulturhus, har hann hevur havt ábyrgd av trimum mentanarstovnum og einari skipan við meira enn 40 starvsfólkum.

Hann hevur akademiskan bakgrund innan evropeiskan mentanarpolitikk, fyrisiting og tónleikavísindi og hevur harumframt drúgvar royndir frá orkestrum, festivalum og mentanarstovnum.

Vil styrkja norðurlendska sambandið

Tá Krarup varð settur fyrr í ár, segði hann, at Norðurlandahúsið hevur ein týðandi leiklut sum brúgv millum Føroyar og hini Norðurlondini og sum pallur fyri samrøðu, samanhald og listarliga dygd.

Norðurlandahúsið lat upp í 1983 og hevur meira enn 300 mentanartiltøk um árið og umleið 120.000 vitjanir árliga.