Bygdarráðið á Viðareiði hevur samtykt eitt uppskot um at broyta byggisamtyktina og leggja eitt nýtt sethúsaøki omanfyri býlingin Uppi við Garð.

Talan er um umleið 11.700 fermetrar, sum í dag eru lagdir út sum landbúnaðarøki. Sambært uppskotinum skal lendið leggjast afturat nýggja sethúsaøkinum A1.2.

Broytingin fevnir um matrikulnummur 157, 158, 177, 182, 183 og 184. Bygdarráðið samtykti uppskotið á fundi 14. apríl 2026.

Á økinum verður loyvt at byggja sethús við upp í tveimum íbúðum. Eftir serloyvi frá byggivaldinum kann eisini verða loyvt at byggja tvíhús, raðhús og ketuhús.

Grundstykkini skulu sum meginregla vera í minsta lagi 500 fermetrar. Verður bygt eftir einari byggiskipan, sum kommunustýrið hevur góðkent, kunnu grundstykkini tó vera minni. Minstamarkið er tá 400 fermetrar fyri einhúskishús og 300 fermetrar fyri hvønn partin av tvíhúsum, raðhúsum og ketuhúsum.

Hús kunnu byggjast í trimum hæddum

Sambært uppskotinum kunnu hús byggjast í trimum hæddum við nýttum lofti. Tey kunnu vera í mesta lagi 7,5 metrar høg til yvirgrindina og 10 metrar til mønuna.

Tað verður eisini møguligt at innrætta høli til handlar, stovnar og annað vinnuvirksemi. Treytin er, at virksemið ikki er til ampa ella lýtir dámin á økinum sum sethúsabýlingur.

Møgulig mótmæli og broytingaruppskot skulu vera Viðareiðis kommunu í hendi í seinasta lagi 27. juli 2026.