Biogassverkið Förka á Skarðshjalla í Hoyvík hevur fingið loyvi til at byggja ein nýggjan goymslutanga, sum skal rúma meira enn 5,1 milliónum litrum av súrløgu frá alivinnuni.

Umhvørvisstovan gav 4. november felagnum ískoyti til verandi umhvørvisgóðkenning. Nýggi tangin skal serliga nýtast, tá stórar nøgdir av deyðfiski skulu handfarast eftir stuttari tíð.

Tangin hevur eina bruttorúmd á 5.121 rúmmetrar og verður ogn hjá P/F Salmon Proteins. Hann verður staðsettur á økinum hjá Förka og knýttur at verandi skipanum á biogassverkinum.

Størri goymsla økir váðan

Umhvørvisstovan staðfestir, at nýggi tangin økir goymsluorkuna munandi. Samstundis broytist váðin, um eitt óhapp skuldi hent.

Tí eru serligar trygdartreytir settar.

Økið kring verkið er umgirt av einum 1,25 metrar høgum betonggarði. Uppsamlingsskipanin skal kunna halda innihaldinum í størsta tanganum aftur á virkisøkinum, um ein tangi brotnar.

Nýggi tangin skal eisini hava ávaringarskipan, sum boðar frá, áðrenn hann verður fullur. Harumframt skal fyllingin kunna steðgast á tryggan hátt.

Förka hevur fulla umhvørvisliga ábyrgd

Hóast Salmon Proteins eigur tangan, hevur Förka fulla umhvørvisliga ábyrgd av rakstri, eftirliti, viðlíkahaldi og møguligum útláti.

Váðametingin og tilbúgvingarætlanin skulu dagførast, áðrenn tangin verður tikin í nýtslu.

Sambært Umhvørvisstovuni broytir útbyggingin hvørki viðgerðarnøgdina ella elframleiðsluna á verkinum. Tí er ikki neyðugt við nýggjari umhvørvisárinsmeting.

Avgerðin kann kærast í seinasta lagi 2. desember 2026.