Nú ið ein nýggjur fíggingarleistur skal finnast fyri eldraøkið, verður eisini neyðugt at finna eina loysn, sum tryggjar, at tað ikki verður ov stórur munur á teimum tænastum, sum tey ymsu økini í landinum kunnu veita teimum eldri.
Tað sigur Aksel V. Johannesen, landsstýrismaður í fíggjarmálum.
Jóhannis Joensen, løgtingsmaður fyri Javnaðarflokkin, hevur spurt hann, um hann hevur hugsað um at sett eina kommunala útjavningarskipan í Føroyum, og um verandi skipan kann føra til, at munurin á skattatrýsti og tænastustøði í kommununum fer at økjast.
Aksel V. Johannesen sigur, at samgongan hevur sett sær fyri, at samráðingar skulu takast upp við kommunurnar um nýggjan fíggingarleist fyri eldraøkið. Í hesum sambandi er ein arbeiðsbólkur settur við umboðum frá landi og kommununum at koma við tilmælum um ein nýggjan fíggingarleist fyri eldraøkið.
Eftir ætlan skal arbeiðið verða liðugt seinni í ár.
Í tí sambandi hevur landsstýrismaðurin eisini biðið arbeiðsbólkin um at útgreina eina blokkstuðulsskipan við teimum fyrimunum og vansum, sum ein tílík skipan kann hava. Arbeiðsbólkurin er annars ikki avmarkaður í at koma við tilmælum.
Aksel V. Johannesen ásannar, at fortreytirnar hjá kommununum eru ymiskar, og tí er vandin fyri, at vaksandi útreiðslurnar til eldraøkið fer at økja um ójavnan ímillum øki í landinum – bæði í sambandi við skattatrýst og tænastustøði.
Ein komandi fíggingarleistur má leggja upp fyri hesi avbjóðing, sigur hann.
Aksel V. Johannesen sigur, at tað er greitt, at tann nýggi fíggingarleisturin má leggja upp fyri, hvussu tey ymsu økini í landinum verða rakt, so at munurin ímillum tey ikki verður ov stórur. Hvussu hetta verður gjørt, stendur til arbeiðsbólkin.
– Hóast kommunusamanlegging ikki er við í arbeiðssetninginum hjá arbeiðsbólkinum, er greitt, at við øktum trýsti á eldraøkið, verður í framtíðini enn meira tørvur á at hugsa um kommunurnar í nýggjum samanhangi, sigur landsstýrismaðurin í fíggjarmálum
Tá ið tilmælið frá arbeiðsbólkinum kemur seinni í heyst, er klárt at fara undir samráðingar við kommunurnar, leggur hann afturat.