Føroyar arbeiða nú við at fáa samsvar millum føroysk p-tøl og donsk CPR-nummur. Endamálið er, at talgildar loysnir sum Samleikin og Skjáttan skulu kunna brúkast í grannalondunum. Hetta var eitt av høvuðsevnunum, tá umleið 15 gestir úr Norður- og Baltalondum hittust í Føroyum í farnu viku.

Talgild ferðing uttan forðingar

Málið er, at tað skal vera líka lætt at flyta seg talgilt millum londini sum at ferðast millum tey. Fólk skulu kunna búgva, arbeiða, lesa og virka í einum øðrum landi uttan talgildar forðingar.

Fyri at hetta skal bera til, mugu talgildu skipanirnar kunna eyðmerkja sama persón tvørtur um landamørk. Sambært Talgildu Føroyum hevur arbeiðið við at fáa samsvar millum føroysk p-tøl og donsk CPR-nummur vakt stóran áhuga í hinum londunum.

Føroyar vertir á fyrsta sinni

Fundurin var í EK-Digital, norðurlendsku embætisnevndini fyri talgilding. Føroyar hava luttikið í samstarvinum, síðan arbeiðsbólkurin varð stovnaður, men hetta var fyrstu ferð, at Føroyar vóru vertir. Fundurin var liður í felags føroyska-danska formansskapinum í Norðurlandaráðnum.