Eitt umfatandi teldusníkaálop hevur rakt matvøruhandlar og fyritøkur kring Evropa. Teldusníkar hava fingið atgongd til køli- og frystiskipanir og broytt hitan, so stórar nøgdir av matvørum eru oyðilagdar. Tað skrivar DR.
Í svenska býnum Sjöbo var hitin í kølidiskunum hjá ICA komin upp í heili 50 stig. Kjøt, ber og grønmeti máttu tveitast burtur.
Sambært DR vórðu fleiri tons av matvørum beind burtur.
Fleiri enn 70 handlar raktir í Belgia
Í Belgia eru fleiri enn 70 handlar og aðrar fyritøkur rakt. Serliga hart hevur álopið rakt handilsketuna Delhaize.
Belgisku ákæruvaldsmyndugleikarnir hava sett eina revsirættarliga kanning í verk.
Eisini í Danmark eru minst fýra fyritøkur raktar. Millum teirra eru ein matvøruframleiðari, ein lívtøknifyritøka og ein fyritøka, sum veitir mat til tiltøk og aðrar fyritøkur.
Danskir myndugleikar upplýsa tó, at teldusníkarnir skjótt vórðu steðgaðir, og at eingin stórur skaði higartil er staðfestur.
ES: Tilvitað álop á matvørutrygdina
ES-nevndarlimurin Christophe Hansen sigur, at talan er um eina tilvitaða roynd at órógva matvørutrygdina í Evropa.
Danska fyritøkan Danfoss hevur staðfest, at útgerð frá henni er millum tær skipanirnar, sum eru raktar.
Sambært DR vórðu líknandi álop framd í Fraklandi í oktober.
Enn er ógreitt, hvør stendur aftan fyri álopini.
Danskir myndugleikar vænta, at fleiri fyritøkur fara at boða frá álopum, tá tær hava kannað sínar skipanir nærri.
