Íslendski uttanríkisráðharrin, Þorgerður Katrín Gunnarsdóttir, kallaði amerikanska sendiharran í Íslandi, Billy Long, á fund eftir eitt uppslag hjá Donald Trump forseta á sosialum miðlum. Tað skrivar RÚV.

Á kortinum, sum Trump legði út á Truth Social sunnudagin, var Ísland hult av amerikanska flagginum.

Ísland kallaði uppslagið óhóskandi

Íslendska uttanríkisráðið sigur við RÚV, at greið boð vórðu givin amerikanska sendiharranum á fundinum.

– Á fundinum varð gjørt púra greitt, at uppslagið varð mett at vera fullkomiliga óhóskandi, upplýsir íslendska uttanríkisráðið.

Eingin tekstur fylgdi við uppslagnum, og Trump greiddi heldur ikki frá, hví hann hevði lagt kortið út.

Billy Long tók formliga við sum amerikanskur sendiharri í Íslandi í síðsta mánaði.