Kristian Krog Hentze, løgtingsmaður, vil nú hava Jacob Vestergaard, landsstýrismann í vinnumálum, at greiða frá, um tunnilin undir Traðarhamri í Sandoynni verður veruleiki – og nær hann í so føri kann gerast.
Í einum skrivligum fyrispurningi frá 15. september spyr hann millum annað, hvat royndarboringarnar á Traðarhamri hava víst um jarðfrøðina og møguleikan at gera tunnilin. Hann vil eisini vita, nær endaliga frágreiðingin verður liðug, og um hon verður løgd alment fram.
Kann gerast partur av Suðuroyartunlinum
Ein av høvuðsspurningunum er, um tunnilin undir Traðarhamri verður prosjekteraður og boðin út sum partur av samlaðu verkætlanini um Suðuroyartunnilin.
Sambært lógini skal P/F Suðuroyartunnilin fyrireika og prosjektera farleiðina frá verandi vegi í Traðardali, eystan fyri Sandsvatn, við vegum og møguligum tunli undir Traðarhamri til undirsjóvartunnilin í Djúpadali. Farleiðin skal eisini knýtast at verandi vegum til Skálavíkar og Skarvanes.
Hentze spyr harumframt, hvussu langur tunnilin eftir ætlan verður, hvar tunnilsmunnarnir skulu vera, og hvør fyribils kostnaðarmetingin er.
Sands kommuna vil hava tunnilin fyrst
Sands kommuna hevur áður mælt til, at tunnilin undir Traðarhamri verður gjørdur liðugur, áðrenn farið verður undir at bora Suðuroyartunnilin úr Djúpadali.
Kommunan hevur víst á, at tunnilin eisini hevði verið ein góð loysn fyri eystanbygdirnar og kundi bøtt um trupulleikarnar við tungari ferðslu gjøgnum Sandafløttin. Meirilutin í Fíggjarnevndini hevur eisini tikið undir við, at tunnilin er ein góð loysn.
