Ung millum 18 og 30 ár, sum búgva í Føroyum, kunnu søkja um at luttaka á Nordic Baltic Youth Summit 2026 í Tallinn í Estlandi. Toppfundurin verður 4. og 5. desember, og umsóknarfreistin er 20. september klokkan 23.59 estlendska tíð.
Fimm høvuðsevni á skránni
Luttakararnir skulu kunna vera við allan toppfundin og samskifta á enskum. Høvuðsevnini eru vitlíki, radikalisering, sálarheilsa, trygd og mótstøðuføri umframt ungdómsluttøka í fólkaræðinum.
Fyrireikararnir leggja dent á, at umsøkjarar ikki nýtast at hava serligar royndir ella fakligan førleika. Endamálið er eisini at fáa fram sjónarmið, hugskot og persónligar royndir hjá ungum.
Norðurlendskt og baltiskt samstarv
Estiska ungdómsráðið skipar fyri toppfundinum. Norðurlendska ráðharraráðið og NORDBUK hava tikið stig til og fíggjað tiltakið í samstarvi við ungdómsráð og ungdómsfelagsskapir úr Norðurlondum og Baltikum.
