Ferðslan við Vága Floghavn er aftur broytt. Arbeiðið byrjaði týsdagin 3. november og væntast at halda fram til 6. desember.

Orsøkin er, at arbeiðið við at gera eina nýggja rundkoyring eystanfyri parkeringsøkið nú er farið í gongd.

Núverandi koyrivegur er stongdur, og ferðslan verður fyribils leidd gjøgnum ein part av parkeringsøkinum P4.

Hetta er aðru ferð síðani august, at koyrivegurin verður lagdur um.

Í august boðaði Vága Floghavn frá, at vegurin norðan fyri parkeringsøkið skuldi leggjast um frá 24. august til 15. oktober. Tað arbeiðið var eisini partur av útbyggingini av parkeringsøkinum.

Sambært Vága Floghavn skulu allir bilførarar fylgja gulu merkingunum, sum vísa nýggju farleiðina. Framvegis verður koyrandi til løðistøðirnar.

Samstundis heldur arbeiðið við einum gongutunli undir vegnum fram. Tunnilin skal binda verandi parkeringsøki saman við nýggja, víðkaða parkeringsøkinum.

Vága Floghavn heitir á bilførarar um at vísa varsemi, meðan arbeiðið fer fram.