Nú danska landskappingin í hondbólti fyri kvinnur er av, er punktum í hesum umfari sett fyri leiklutin hjá føroyska landsliðsspælaranum Súnu Krossteig Hansen í donskum hondbólti. Hon flytur nú til Montenegro, har hon fer at spæla við ŽRK Budućnost í høvuðsstaðnum Podgorica í Montenegro. Talan er um størsta felagið í landinum, sum síðsta kappingarár vann landskappingina.
Í Skanderborg fjala tey ikki yvir, at tey halda Súnu K. Hansen vera góðan spælara. Tey halda hana vera so góða, at hon nú er kosin at vera besti spælarin í felagnum síðsta kappingarár.
Tað eru venjararnir í felagnum Skanderborg, sum undir farvæl døgurðanum valdu Súnu K. Hansen at vera árssins spælari.
Venjararnir søgdu, at Súna alt kappingarárið gekk undan bæði á og uttanfyri vøllin – í stríðsvilja, hugburði og góðum lagi, og samstundis var hon ofta dystaravgerandi og tók ábyrgd. Eisini tá ið tað av álvara var trýst á.
