Støðufesti er avgerandi, skulu føroyskar fyritøkur tora at leggja langtíðarætlanir, gera íløgur og skapa nýggj arbeiðspláss. Tað staðfestir Føroya Arbeiðsgevarafelag í nýggju ársfrásøgnini.
Óvissan úti í heimi er vaksin. Geopolitiskur spenningur, kríggj, prísvøkstur, veikari altjóða búskapargongd og broytt handilsviðurskifti raka føroyskar fyritøkur, sum virka í einum lítlum og opnum búskapi.
Felagið heldur tí, at politiska skipanin eigur at tryggja støðugar og kappingarførar karmar her heima.
Óvissan ger íløgur truplari
– Í ótryggum tíðum er einfaldni og støðufesti ein styrki, skrivar Jón Sigurdsson, formaður í Føroya Arbeiðsgevarafelag.
Sambært felagnum mugu skattir og gjøld ikki hækka so nógv, at føroyskar fyritøkur fáa verri kappingartreytir enn fyritøkur í grannalondunum.
Umsitingarligu krøvini eiga eisini at vera greið, einføld og rímilig. Tung umsiting tekur tíð, orku og tilfeingi frá rakstri, menning, nýhugsan og nýskapan.
Karmarnir mugu røkka fleiri ár fram
Føroya Arbeiðsgevarafelag ávarar eisini ímóti ov stórum vøkstri í almennu útreiðslunum. Tað kann leggja trýst á búskapin, skattatrýstið og arbeiðsmarknaðin og harvið skerja møguleikarnar hjá privatu vinnuni at vaksa og gera íløgur.
– Fyritøkur taka avgerðir við atliti at fleiri árum fram í tíðina. Tí hava tær tørv á góðum og greiðum politiskum kørmum, so tað ber til at leggja ætlanir langt fram í tíð, stendur í ársfrásøgnini.
