Tórshavnar kommuna og Hugskotið skipa fríggjadagin 2. oktober aftur fyri Vinnuforum í Kongshøll. Í ár verður sjóneykan sett á leiðslu, broytingar, vinnumøguleikar og fólk og fyritøkur, sum hava sett nakað í gongd og skapað úrslit.

Tá leiðarar hugsa ov nógv

Kristian Eli Andersen hevur høvuðsinnleggið. Við støði í bókini Når ledere tænker for meget fer hann at viðgera, hvussu stúran, ivi og føst tankamynstur kunnu ávirka avgerðir, samstarv og trivnað á arbeiðsplássinum.

Hann setur eisini spurningin, nær nýggjar ætlanir og broytingar skapa veruligt virði – og nær tær flyta fokus frá tí, sum longu riggar.

Eftir høvuðsinnleggið verða seks stuttar framløgur úr føroyskum vinnulívi. Umboð fyri millum annað Klintra, Reforma Pilates, Seafacts Solutions, Visit Faroe Islands og Grønu Matveitingina fara at greiða frá royndum, møguleikum og avbjóðingum.

Vinnuforum verður klokkan 13.00–15.30. Tiltakið er ókeypis, men neyðugt er at melda til.