Ein stór flogvanlukka varð sett í verk sum venjing í Vága Floghavn týsdagin. Klokkan 16.32 fór alarmurin, og meira enn 400 fólk frá 16 myndugleikum og felagsskapum tóku lut í tilbúgvingarvenjingini.

Í venjingini varð ímyndað, at eitt flogfar við 153 fólkum umborð fór av flogbreytini undir lending á norðaru síðu. Síðani kom eldur í flogfarið.

Eldur, skadd fólk og stongdur flogvøllur

Venjingin fevndi um eldsløkking, roykkaving, bjarging, bráðfeingis skaðaviðgerð og sjúkraflutning. Fólk vórðu skrásett, farstøðin varð rýmd, og vant varð eisini, hvussu dálking eftir eina vanlukku kundi fyribyrgjast.

Samstundis varð flogvøllurin stongdur fyri flogferðslu. Flogferðslan varð umstýrd, áðrenn flogvøllurin seinni varð latin uppaftur.

Umleið 130 luttakarar vóru statistar, umleið 150 vóru sløkkiliðs- og bjargingarfólk, og umleið 130 vóru onnur starvsfólk.

Fyrireikað í eitt ár

Ein stýrisbólkur og ein arbeiðsbólkur við umboðum fyri Vága Floghavn, løgregluna og Sjúkraflutningstænastuna høvdu fyrireikað venjingina í umleið eitt ár. Bert fá fólk kendu innihaldið frammanundan, so venjingin kundi gerast so veruleikakend sum gjørligt.

Føroyskir og danskir eygleiðarar fylgdu venjingini. Ein nágreinilig eftirmetingarfrágreiðing verður liðug í november. Fyrsta samanumtøkan vísti, at nógvar uppgávur vórðu loystar sum ætlað, men eisini at einstøk viðurskifti skulu betrast.