Landsstýrið hevur sett kós móti einum nýggjum vaktar- og bjargingarskipi, sum skal avloysa Tjaldrið. Skipið fyllir 50 ár í ár og verður í fíggjarlógaruppskotinum lýst sum gamalt og ótíðarhóskandi. 

Í fíggjarlógaruppskotinum fyri 2027 eru 4 mió. kr. settar av til at projektera nýggja skipið. Samlaði byggikostnaðurin verður mettur til 300–400 mió. kr., og ætlanin er, at skipið skal vera klárt í 2030. 

Vandin fyri breki veksur

Tjaldrið er væl røkt, men aldurin merkist. Sambært viðmerkingunum til fíggjarlógaruppskotið gerst vandin fyri, at skipið endaliga má leggjast vegna brek, størri fyri hvønn dag. 

Samstundis eru uppgávurnar á sjónum vorðnar fleiri og størri. Føroyska sjóøkið røkkur um 400 fjórðingar úr enda í annan, og í miðal eru fleiri enn 100 skip í føroyskum sjógvi dagliga. Skipaferðslan er vaksin, og krøvini til bjarging, eftirlit og tilbúgving eru størri enn áður.

Skal eisini verja sjókaðalar

Nýggja skipið skal ikki bara røkja bjarging og fiskiveiðieftirlit. Tað skal eisini styrkja olju- og umhvørvistilbúgvingina og stytta svartíðina til bjargingar. 

Broytta trygdar- og verjupolitiska støðan í Norðuratlantshavi hevur eisini týdning. Skipið skal geva Føroyum betri møguleikar at luttaka í felags venjingum, verja sjókaðalar og annað undirstøðukervi á havbotninum og røkja logistiskar uppgávur í samstarvi við grannalond og sameind.